Bekasi (WartaBetawi) Kagak jarang mase anak-anak jadi cermin kite waktu dewase. Di hari perayaan Hari Anak Sedunia enih, kagak ade salahnye kalo kite ngomongin esensi dari kehidupan anak-anak ntuh sendiri.
Banyak nyang bilang, kebahagiaan seseorang juge bise diliat dari kualitas kebahagiaannye waktu die masing kecit. Olehkarenanye, Balita ato tahun emas disebut ama orang-orang nyang tau pendidikan psikologi anak, makanye Balite adalah saat nyang tepat bakal bekelin anak-anak kejenjang ke kebahagiaan nyang hakiki nantinye, saat mereka jadi orang gede nanti.
Anak-anak ntuh ibarat kertas putih nyang butuh coretan-coretan ber-Aura Positif, agar nantinye jadi Puisi-puisi Hidup nyang indah dalam alam bawah sadar si anak.
Kite semue dah tau, rusaknye remaje bukan tibe-tibe aje, tapi lebih karene proses Kognitif, Afektif, sampe Motorikmye nyang kagak berkesinambungan dalam rel nyang positif.
Pada kesempatan Hari Anak Sedunia enih, ngingetin kite nyang ude dewase untuk menerawang, ape kekurangan kite saat kite Balita dulu, bukan bakal nyalahin Orang Tua kite nyang mungkin lalai dalam mendidik kite, tetapi lebih pade biat kite bise ngelurusin rel nyang dulu mungkin sedikit bengkok, untuk menuju kebahagian nyang hakiki, pada akhirnye buat jadi sehat pikiran kite sendiri.
Bagi Orang Tua nyang kebetulan punye anak-anak Balita, jadiin momen enih untuk merenung, dan mensinkronkan pikiran Lo dengan talenta nyang udeh keliat sejak dini ame anak-anak Lo, biat anak-anak tumbuh dalam rel nyang bener disertai rase suke cite dan bahagie, tanpe beban pemaksaan kehendak Orang Tuanye sendiri.
Sekali lagi, Hari Anak adalah hak dan kewajiban kite semue, biar mereka tumbuh sehat segale-galenye. (SSM)
