WARTA MERDEKA

Reoni Alumni SMPN 57 Jakarta Angkatan-82 pake gaye Betawi

Gawil, ketua panitia Reoni smpn 57 jaksel
Jakarta, (WartaBetawi) - Nah eni nih emang top banget dah, ada Reonian nyang punye konsep pake Budaye Betawi

Ibukote kite, Jakarte, punye sejare nyang panjang. Dimane taon enih, 2018, Jakarte bakal genep berumur 491 tahun, tepatnye tanggal 22 Juni. 

Sebuah perjalanan nyang panjang banget ampe saat enih. Banyak peristiwe sosial, budaye, politik, nyang bersejare lainnye, kejadian di di kota nyang punye luas wilayah 661,52 km2 nih.

Kote Jakarte penduduknye ampe 10,37 juta jiwe (2017), kagak kalah hebat kalo dibandingin ame kote-kote lain di negeri sendiri, juge di luar negeri. 

Budaye lokalnye hasil dari  campuran beragam etnis, seperti tarian, busane, juge kulinernye, punye khas tersendiri. Mereka nyang bermukim di ibukota, apalagi di kampung-kampung asli Betawi, pasti dah kenal makanan kaye kerak telor, kue odading, kue rangi, dan lainnye, serte ondel-ondel, tari topeng, busane encim, lagu ‘kicir-kicir’, rumah tradisional ‘Rumah Bapang’, dengan senjatenye Golok. Paling kagak, ntulah beberape contoh menonjol nyang jadi bagean dari Budaye Betawi.

Apaan tuh "Bek 2 Skul"?
Sadar kagak sih, kalo asal sekolah menengah pertama kite-kite berade di jantung ibukota, nyang budaye lokalnye sohor banget, nyang dibilang "Budaye Betawi". Emang sih kalo lo liat secare demografi, make keliatan dah tuh kalo jumlah etnis Jawe (35,16%), jauh lebih banyak dari Betawi sendiri nyang cumang 27,65%, abis ntuh etnis Sunda (15,27%), Tionghoa (5,53%), Batak (3,61%), Minang (3,18%), Melayu (1,62%), dan Bugis, Aceh, Madura, dan lain-lain. Walau begitu, kagak berlebihan pabila kite dari Panitia Reoni Alumni SMPN 57 Jakarta Angkatan 1982, nyelenggarain acare "Bek 2 Skul" dengan mengangkat Budaye Betawi.

Tema dari acare enih berasal dari frasa Bahasa Inggris nyang dilafalin ke dalam Bahasa Indonesia, ato back to school jadi “Bek 2 Skul”. Arti harfieh dari frasa ntuh adalah "kembali ke sekolah", nyang ngandung makne ajakan kepade pare alumni untuk "balik" ke sekolah. Bukan dalam arti nyang sebenarnye, itu cumang ajakan bakal pare alumni untuk mengadakan kegiatan reuni di almamater tercinte. Kalo selame enih, pare alumni banyak nyang bikin kegiatan pertemuan di luar sekolah, kaya di rumah makan, rumah pribadi salah satu alumni, gedung pertemuan atau vila di Puncak, Bogor.

Gune nyesuain dengan konsep acare enih, kite-kite juge nyebut istilah acara enih dengan ngikutin logat Betawi, yakni REONI bukan Reuni. Makanye lengkap dah konsepnye, dan juge tajuk acara enih nyang ngusung Budaye Betawi.

Program Kegiatan
Acare reoni nyang dikomandanin ame Suhendra Sayuti Kartawijaya nyang akrab disapa Gawil, bakal diadain pade hari Minggu 11 Maret 2018, bertempat di halaman sekolah SMPN 57 Jakarta. Rangkaian acare diawalin ame jalan kaki santai barengan, ngambil rute napak tilas nyusurin jalan-jalan penuh kenangan, nyang hulu sering dilewatin  ame alumni pade mase sekolah. Abis entuh, balik ke sekolah bakal nikmatin suasane dekorasi gaye Betawi. Kagak lupe, bakal nikmatin juge menu penganan asli Betawi, sambil nonton tari tradisional Betawi, dendang lagu Betawi, dan pake busane encing ame encang Betawi. Gawil lulusan tahun1982, die kebetulan juge anak Betawi asli. Die juge udeh siap ame pakaian khas Betawi-nye.

Kegiatan reoni enih merupakan kolaborasi kerje bareng pare alumni nyang jadi panitie dan pihak sekolah. Selain nyediain tempat, pihak sekolah juge ngasih dukungan berupe persembahan Tari Topeng dari siswa-siswi aktif di SMPN 57 Jakarta. Kaya gini nih, wujud nyate dari kolaborasi nyang sinergis.

Selain ntuh, juge ade display foto jadul semase sekolah dan stand poto bernuansa Betawi... Pare alumni bise leluase berpoto bareng dengan peke busane Betawi. Berkaitan dengan poto enih, para alumni harus membayar untuk setiap potonye. Uang nyang kekumpul ntuh, bakal disumbangin untuk pembangunan mushole di sekolah kite.

Adapun reoni kali enih adalah dalam rangka mensyukuri usia kelulusan 36 tahun. Sebuah usie nyang kagak mude lagi. Udeh banyak alumni nyang lulus dari almamater sampe saat enih. Dan banyak pule dari mereka nyang nerusin ke jenjang pendidikan tinggi, beraneka profesi dan kegiatan pade saat enih. Bahkan, tentunye, mereka udeh punye keturunan dua generasi, alias punye anak ame cucu. Begitu juge kagak kebilang, mereka nyang udeh pulang ke haribaan.

Tujuan dari reoni enih, selain temu kangen, adalah juge bakal ngerawat silaturahmi, dan pade saling memanfaatin peluang positif nyang mungkin terjadi pada saat pertemuan, serta beramal memberikan donasi bakal pembangunan mushola almamater. Diarapin kegiatan enih bise menjaring sejumlah alumni nyang tersebar di seantaro pelosok negeri, bahkan di luar negeri. Dan boleh “dikate”, enih adalah pertemuan langka Alumni ‘Gocap Seven’ sebutan lain dari SMPN 57, yang mengangkat tema Budaye Betawi. (RP) | Foto : Koleksi Pribadi