 |
| Logikanye Togok anak kelas satu SD |
Jakarta (WartaBetawi) - Elu tau kagak bangse kucing, nyang sipatnye ame prilakunye jelek banget.
Bangse kucing nih, kagak punye malu. Kagak percaye, nah elu cari aje literasinye, pasti elu tau dah kejelekan kucing.
Mangkanye kalo elu kenal ame orang-orang nyang punye sipat kaye kucing, dahlah, jangan elu temenin, apelagi jadi pemimpin di kelompok elu. Pasti elu cumang dikelecein aje.
Ngelantur dikit nih, abis lagi pengen nulis tentang kucing, tiba-tiba bangku aye keseret banjir.
Mangkanye aye tanyain ame anak tetangge, nyang kebeneran melipin lewat disamping bale rume aye.
Tong kalu menurut elu, gimane yak, ngatasin banjir nyang kagak pernah kejadian sebelumnye di kampung kita enih.
Dasar anak pitik, die bilang : "Cing kagak suseh, tinggal encing sabarin aje, tunggu ampe Kemarau"
"Keren kagak Cing, omongan Udin, percis kaya mantan Rektor Universitas Paranormal di Jakarte Selatan khan ye...."
Iye Tong elu keren banget, tapi inget, kite enih bangse Betawi, kagak ade turunan nipunye, kaya bangse itu mantan Rektor, jadi elu kudu jadi Rektor nyang bener-bener pinter, ame jujur paling penting, nyang diajarin ame nenek moyang elu, alias orang Betawi asli.
Nah kalo elu jujur, misalnye kepemimpjan elu ternyate kagak beres, kalo dibandingin ame nyang sebelumnye, mendingan elu mundur aje, sipat kesatria moyang kite-kite.Bukannye kaya sipat kucing, nyang mau benernye sendiri.
"Emangnye si mantan Rektor kagak punye malu kaya kucing ya Cing?"
Ya kalo die punye malu, khan udeh ngundurin diri dari kapan tau....
Gue bangge jadi orang Betawi yang punye budi pekerti luhur.... (DN)
Foto : Istimewa
.
